Bayern mætir Barcelona í úrslitaleik Audi-bikarsins

Það verður Bayern München sem mætir Barcelona í úrslitaleik Audi-bikarsins á morgun en líkt og í fyrri undanúrslitaleiknum fyrr í dag þá þurfti vítaspyrnukeppni til þess að fá úrslit.

Bayern Munchen og AC Milan gerðu 1-1 jafntefli í venjulegum leiktíma en Bayern vann vítaspyrnukeppnina 5-3 þar sem þýska liðið skoraði úr öllum sínum vítaspyrnum.

Svíinn Zlatan Ibrahimovic kom AC Milan yfir eftir aðeins fjórar mínútur eftir að hafa fengið stungusendingu inn fyrir vörn Bayern.

Toni Kroos jafnaði leikinn á 35. mínútu með skoti fyrir utan teig og fleiri urðu mörkin ekki í venjulegum leiktíma.

Vítaspyrnukeppnin: Bayern-AC Milan

1-0 David Alaba

1-1 Robinho

2-1 Mario Gomez

2-2 Massimo Oddo

3-2 Thomas Müller

3-3 Thiago Silva

4-3 Toni Kroos

Yfir Alberto Paloschi

5-3 Bastian Schweinsteiger