Hátt í þúsund minntust Hemma í gærkvöldi

Hátt í þúsund FH-ingar mættu á minningarstund í Kaplakrika í gærkvöldi þar sem Hermanns Fannars Valgarðssonar var minnst. Að sögn Viðars Halldórssonar, formanns FH, þá er mikill drungi yfir bæjarfélaginu. Fráfall Hermanns, eða Hemma eins og hann var að jafnan kallaður, er sem reiðarslag fyrir Hafnfirðinga.

Hemmi var bráðkvaddur á þriðjudagskvöldinu þegar hann var úti að skokka. Hemmi sat í stjórn FH og var í raun svo mikill FH-ingur að hann lét húðlúra merki liðsins á kálfann á sér.

„Þetta er rosalegt áfall en verst fyrir aðstandendur Hemma. Það er erfitt að setja sig í spor þeirra," segir Viðar en fráfall Hemma hefur ekki síður haft áhrif á íþróttafélagið, því leik FH og Hauka, sem fram átti að fara í vikunni, var frestað vegna tíðindanna. Að sögn Viðar treysti liðið sér ekki til þess að spila vegna áfallsins.

Viðar segir að minningarstundin í gærkvöldi hafi verið falleg. Þar hafi verið gífurlegur mannfjöldi. Prestur Fríkirkjunnar í Hafnarfirði, séra Einar Eyjólfsson, las minningarorð og fór með bænir. Þá söng tónlistarmaðurinn Jón Jónsson eitt lag, en hann er náfrændi Hemma.

Þess má geta að síðar um kvöldið var einnig haldin minningarstund í Fríkirkjunni fyrir vini og vandamenn.

Það er þungt hljóðið í Viðari og það fer ekki á milli mála að andlát Hemma hefur tekið gífurlegan toll af öllum bæjarbúum. „Það má segja að það sé drungi yfir öllu. En Hemmi hefði ekki viljað neitt annað en að hlutirnir héldu áfram," segir Viðar

Og það er margt á prjónunum, þannig vinna FH-ingar hörðum höndum að því að skipuleggja minningartónleika í hans nafni.

Hermann lætur eftir sig eiginkonu og fjögurra ára gamlan son.