Vill láta loka herstöðvum

Hamid Karzai, forseti Afganistans, segir að þegar Afganar taka sjálfir við umsjón öryggismála verði nauðsynlegt að loka þeim alþjóðlegu herstöðvum, sem sinna einkum uppbyggingar- og þróunarstarfi í sveitum landsins.

Hann segist ekki krefjast þess að herstöðvunum verði lokað strax, heldur jafnhliða því að Afganar taka við öryggismálunum af fjölþjóðaherliðinu.

Sunset Belinsky, talskona fjölþjóðahers Atlantshafsbandalagsins í Afganistan, segir að seinni partinn í mars verði skýrt nánar frá því hvaða fyrirkomulag verði haft á því, þegar Afganar taka við umsjón öryggismála.- gb