Garðar aftur í Stjörnuna

Garðar Jóhannsson hefur skrifað undir tveggja ára samning við uppeldisfélag sitt, Stjörnuna í Garðabæ.

Garðar hefur verið í atvinnumennsku síðustu ár en kom við sögu í þremur leikjum með Stjörnunni í Pepsi-deildinni í sumar.

Hann lék með Hansa Rostock í Þýskalandi á fyrri hluta síðasta árs og svo kláraði hann tímabilið með Strömsgodset í Noregi eftir stutt stopp hér á Íslandi.

Hann lék síðast með Stjörnunni árið 2002 og á að baki alls 53 leiki með liðinu í deild og bikar og skoraði hann í þeim 31 mark.

Garðar hefur einnig leikið með KR og Val hér á landi sem og Fredrikstad í Noregi þar sem hann var í tvö ár, frá 2007 til 2009.

Hann verður 31 árs gamall á árinu og leikur sem framherji. Hann hefur sex sinnum leikið með A-landsliði Íslands og skoraði í þeim leikjum tvö mörk.