Eigandinn fundinn - lambið búið að vera týnt í fimm daga

„Það er bara gott að þetta endaði vel og gott að eigandinn fannst," segir Sólveig Ingvarsdóttir, íbúi í Flúðaseli í Reykjavík. Við sögðum frá því fyrr í dag að lamb hafi legið í garðinum hennar þegar hún ætlaði að fara vökva blómin í dag. Sólveig auglýsti eftir eigandanum og er hann nú fundinn.

Sólveig segir að lögreglan á höfuðborgarsvæðinu hafi hringt upp á Vatnsenda en þar er rekið fjárbú. „Lambið var búið að vera týnt í fjóra eða fimm daga, svo það er gott að það komið heim til sín," segir Sólveig.

Hún segir að það hafi verið ágætis reynsla að hafa heimalning í garðinum hjá sér í nokkra klukkutíma þó það sé ekki alveg eðlilegt fyrir íbúa í íbúahverfi í Breiðholti. „Þetta var bara gaman. Það fékk mjólk í pela og þambaði alveg tvo pela af mjólk blandaðri í vatn," segir Sólveig en lambið var eflaust mjög þyrst eftir að hafa verið á reiki í Breiðholtinu og nágrenni í fjóra eða fimm daga.

Lambið hefur það nú gott í kringum önnur lömb á Vatnsendanum og nýtur veðurblíðunnar.