Sagan endalausa - Norðmenn tryggðu sér sigur úr víti í lokin

Ísland tapaði 1-0 fyrir Noregi á Ullevaal-leikvanginum í Osló í kvöld íleik þjóðanna í undankeppni Evrópumótsins. Íslenska liðið virtist vera að landa stiginu þegar markvörðurinn Stefán Logi Magnússon fékk á sig klaufalegt víti rétt fyrir leikslok.

Íslenska liðið hefur þar með aðeins náð í eitt stig í fyrstu sex leikjum sínum í undankeppninni en liðið mætir Kýpur á heimavelli á þriðjudaginn kemur í næstsíðasta leik sínum í riðlinum.

Norðmenn náðu þarna í afar dýrmæt stig í baráttunni um að komast inn í úrslitakeppni Evrópumótsins sem fer fram í Pólland og Úkraínu næsta sumar. Norðmenn unnu þrjá fyrstu leiki sína í riðlinum en höfðu síðan aðeins fengið eitt stig út úr síðustu tveimur leikjum sínum.

Alveg eins og á móti Dönum í Kaupmannahöfn í fyrra þá þurfti íslenska landsliðið að sætta sig við að fá á sig sigurmark á lokamínútunum. Sigurmark Dana kom í uppbótartíma en að þessu sinni fengu Norðmenn víti tveimur mínútum fyrir leikslok.

Varamaðurinn John Carew fiskaði vítaspyrnu á Stefán Loga Magnússon tveimur mínútum fyrir leikslok og Mohammed Abdellaoue skoraði af miklu öryggi úr vítaspyrnunni.

Norðmenn voru sterkara liðið á vellinum en gekk illa að skapa sér góð færi. Íslenska liðið varðist lengstum vel en Norðmenn fengu nokkur færi og skutu meðal annars í stöngina á íslenska markinu í seinni hálfleik.

Þetta var enn eitt svekkjandi tap íslenska liðsins í undankeppni undir stjórn Ólafs Jóhannessonar en íslenska liðið hefur aðeins unnið einn af fimmtán keppnisleikjum undir hans stjórn.

Baráttan og varnarvinnan voru í góðu lagi stærsta hluta leiksins og íslenska liðið fékk tvö mjög góð færi í leiknum. Það fyrra fékk Rúrik Gíslason strax á þriðju mínútu og svo fékk Eiður Smári Guðjohnsen gott skallafæri á 67. mínútu þegar hann skallaði frábæra fyrirgjöf Hjartar Loga Valgarðssonar framhjá markinu.

Boltavakt Vísis og Fréttablaðsins var með beina lýsingu frá viðureign leiknum í Osló og má sjá hana hér fyrir neðan.