Birkir: Ekkert betra en að spila gegn Noregi

„Ég er mjög spenntur fyrir þessum leik. Það er ekkert jafn skemmtilegt og að mæta norska landsliðinu," sagði Birkir Bjarnason, leikmaður íslenska liðsins, við Vísi í gær.

Birkir hefur búið í Stafangri í Noregi frá ellefu ára aldri og því eftirvæntingin sérstaklega mikil hjá honum.

„Ég hef spilað einn A-landsleik gegn Noregi og fleiri með yngri landsliðunum," sagði hann en viðtalið má sjá í heild sinni hér fyrir ofan eða með því að smella hér.

„Ég þekki suma strákanna ágætlega eftir að hafa spilað í norsku úrvalsdeildinni í 6-7 ár," bætti Birkir við en hann segir stemninguna í íslenska liðinu góða.

„Við erum margir strákar úr U-21 liðinu í hópnum og við þekkjumst því vel þaðan. Stemningin er því ekki mjög frábrugðin því sem ég þekki þaðan þó svo að við séum með nokkra reynslubolta í hópnum líka."