Indriði: Var búinn að djöflast í Moa allan leikinn

Indriði Sigurðsson átti góðan leik með íslenska liðinu gegn Noregi í kvöld en hann segir úrslitin hafa verið afar svekkjandi.

Moa skoraði eina mark leiksins úr vítaspyrnu á 88. mínútu en hann gerði annars ekki mikið í leiknum.

„Það var pressa á okkur í fyrri hálfleik en mér fannst við ná að standa hana ágætlega af okkur í þeim síðari. Í raun fannst mér ekkert mark liggja í loftinu þegar þeir svo náðu að skora,“ sagði Indriði en viðtalið má sjá í heild sinni hér fyrir ofan eða með því að smella hér.

„Mér fannst ég og Sölvi ná að hafa ágæta stjórn á Moa en svo skorar hann úr vítinu og vinnur þennan leik fyrir þá. Ég var búinn að djöflast í honum allan leikinn og hann í mér og því er það vissulega sérstaklega súrt að hann hafi svo skorað sigurmarkið. En svona er fótboltinn. Við þurfum að taka það sem er jákvætt úr þessum leik. Við fengum jú tvö færi til að stela sigrinum þó svo að það hefði kannski ekki verið sanngjarnt. En við verðum að læra að nýta færin okkar betur og komast þokkalega frá leikjunum.“