Umfjöllun: Freyr Bjarnason skallaði FH-inga áfram í bikarnum

FH-ingar komust í kvöld í 16-liða úrslit Valitor-bikar karla í knattspyrnu eftir sigur á Fylki í framlengdum leik, en leiknum lauk með 3-2 sigri Fimleikafélagsins. Staðan var 2-2 eftir venjulegan leiktíma, en Freyr Bjarnason, leikmaður FH, skoraði sigurmarkið.

Leikurinn hófst nokkuð rólega í Krikanum og leikmenn liðanna áttu erfitt með að ráða við slæmar aðstæður. Hægt og rólega komust leikmenn í takt við leikinn og á 18. mínútu skoruðu gestirnir fyrsta mark leiksins.

Gylfi Einarsson skallaði boltann í netið eftir hornspyrnu frá Andrési Má Jóhannessyni. Mark Fylkismanna lá nokkuð í loftinu og greinilegt að þeir mættu tilbúnir til leiks.

FH var aftur á móti ekki lengi að jafna metin en aðeins sjö mínútum síðar skoraði Pétur Viðarsson mark fyrir heimamenn eftir hornspyrnu frá Viktori Erni Guðmundssyni. Pétur fékk boltann einn og óvaldaður við marklínuna og þrumaði boltanum í netið eftir frábæra spyrnu frá Viktori Erni.

Fylkismenn létu jöfnunarmarkið ekkert á sig fá og komust fljótlega aftur yfir þegar Albert Brynjar Ingason skoraði annað mark gestanna.

Mark Fylkis kom eftir frábært samspil gestanna, en Andri Þór Jónsson átti frábæra sendingu inn fyrir vörn FH-inga, þar skallaði Ingimundur Níels knöttinn á Albert sem þrumaði boltanum í netið með vinstri fæti.

Staðan var 2-1 í hálfleik sem verður að teljast nokkuð sanngjarnt þó svo að Fylkismenn hefðu getað skorað fleiri mörk.

Síðari hálfleikurinn hófst rólega rétt eins og sá fyrri en FH-ingar voru greinilega ákveðnir í því að jafna metinn. Þegar tuttugu mínútur voru eftir af venjulegum leiktíma náði Hannes Þ. Sigurðsson að jafna leikinn.

Viktor Örn Guðmundsson, leikmaður FH, átti virkilega glæsilega fyrirgjöf inn á Hannes sem stýrði boltanum glæsilega í netið. FH-ingar voru að leika sannfærandi á þessum tíma og áttu skilið að jafna metinn.

Það sem eftir lifði venjulegs leiktíma gerðist fátt markvert og liðin áttu erfitt með að skapa sér færi. Því þurfti að framlengja leikinn.

FH-ingar byrjuðu fyrri hálfleik framlengingarinnar vel og sýndu strax ákveðið frumkvæði. Þegar aðeins sex mínútur voru liðnar af framlengingunni náðu FH-ingar að komast yfir og skora sitt þriðja mark í leiknum.

Varnarjaxlinn, Freyr Bjarnason, skallaði boltann í netið eftir góða fyrirgjöf frá Guðmundi Sævarssyni úr aukaspyrnu. FH réði lögum og lofum það sem eftir lifði leiks og unnu að lokum flottan sigur.

Sterkur karakterssigur FH-inga í kvöld og spurning hvort hann komi liðinu á beinu brautina.

FH 3 – 2 Fylkir0-1 Gylfi Einarsson (18.)

1-1 Pétur Viðarsson (25.)

1-2 Albert Brynjar Ingason (34.)

2-2 Hannes Þ. Sigurðsson (67.)

3-2 Freyr Bjarnason (96.)

Áhorfendur: Ekki uppgefið

Dómari: Magnús Þórisson 7

Skot (á mark): 10 – 10 (5-6)

Varin skot: Gunnleifur 4 – 4 Ísak

Horn: 13 – 8

Aukaspyrnur fengnar: 15 – 15

Rangstöður: 2-4

FH (4-3-3)

Gunnleifur Gunnleifsson 7

Guðmundur Sævarsson 7

Freyr Bjarnason 7

Pétur Viðarsson 6

Viktor Örn Guðmundsson 8 *maður leiksins

(94. Tommy Fredsgaard Nielsen - )

Björn Daníel Sverrisson 6

(82. Bjarki Gunnlaugsson -)

Hólmar Örn Rúnarsson 6

Atli Guðnason 5

Matthías Vilhjálmsson 7

Gunnar Kristjánsson 5

(67. Atli Viðar Björnsson 5)

Hannes Þorsteinn Sigurðsson 7

Fylkir (4-3-3)

Ísak Björgvin Gylfason 7

Andri Þór Jónsson 6

Þórir Hannesson 6

Kristján Valdimarsson 6

Tómas Þorsteinsson 5

(73. Kjartan Ágúst Breiðdal )

Andrés Már Jóhannesson 6

Ásgeir Börkur Ásgeirsson 6

Gylfi Einarsson 7

(90. Davíð Þór Ásbjörnsson - )

Ingimundur Níels Óskarsson 6

Albert Brynjar Ingason 7

Jóhann Þórhallsson 5

(38. Andri Már Hermannsson 5)