Ekki nota túrbaninn strákar

Hamid Karzai forseti Afganistans hefur átt fund með klerkaráði landsins og beðið það um að hvetja sjálfsmorðskandídata Talibana til þess að fela ekki sprengjur í túrbönum sínum eða öðrum trúarlegum táknum.

 

Á síðustu fimm vikum hafa talibanar myrt tvo háttsetta embættismenn í Kandahar með þessum hætti. Það er kaldhæðnislegt að hugsa til þess að múslimaklerkar dæmdu danska skopmyndateiknarann Kurt Westergaard til dauða á sínum tíma fyrir að teikna Múhameð spámann með sprengju í túrban sínum.

 

Talibanar hafa einnig notað kvennaklæðnaðinn búrka til að fela sprengjur, en búrkan felur íveranda sinn frá toppi til táar.