Byltingarandinn smitast til Líbíu

Átök brutust út í hafnarborginni Benghazi í Líbíu í nótt í kjölfar þess að þekktur umbótasinni var handtekinn. Þar lenti saman stuðningsmönnum og andstæðingum stjórnar Muammar Gaddafis.

BBC greinir frá því að lögregla hafi beitti gúmmíkúlum og táragasi á fjöldann. Talið er að um tvö þúsund manns hafi tekið þátt í mótmælunum, fjórtán eru slasaðir, þar af tíu lögreglumenn.

Mótmæli eru afar sjaldgæf í ríkinu en því hefur Gaddafi stýrt í 41 ár. Mótmælin í Líbíu eru sett í samhengi við byltingar sem þegar hafa orðið í Egyptalandi og Túnis en landið liggur milli þeirra tveggja. Verið að skipuleggja netmótmæli gegn stjórnvöldum í Líbíu á morgun fimmtudag.