Funda með stóriðju vegna kolefnisgjalds

Stjórnvöld munu hitta fulltrúa stóriðjunnar vegna fyrirhugaðs kolefnisskatts sem styr hefur staðið um. Fjármálaráðherra segir fyrirtæki ekki verða tvísköttuð. Ekki komi til gjaldsins fyrr en 2013 vegna fyrri loforða gagnvart stóriðju.

Steingrímur J. Sigfússon fjármálaráðherra vísar því á bug að stjórnvöld séu að svíkja samninga gagnvart stóriðjunni með fyrirhuguðu kolefnisgjaldi á rafskaut. Fyrsti áfangi skattheimtunnar komi ekki til framkvæmda fyrr en árið 2013, einmitt vegna samninga við stóriðjuna, en þeir renni sitt skeið á enda 2012.

Vilmundur Jósefsson, formaður Samtaka atvinnulífsins, sakaði stjórnvöld um samningsrof í Fréttablaðinu í gær. Stóriðjan hefði fallist á að greiða fyrirfram tekjuskatta á árunum 2010 til 2012 gegn því að ekki yrði lagt á kolefnisgjald á rafskaut. Þá þýði gjaldið tvöfalda skattheimtu þar sem fyrirtækin þurfi einnig að kaupa hluta af losunarheimildum sínum.

Steingrímur segir þetta af og frá. Horft hafi verið til samninganna við tímasetningu gildistöku skattsins. Þá hafi aldrei staðið til að tvískatta fyrirtæki.

„Í umsögn um þetta ákvæði í greinargerð er tekið fram að framhaldið verði skoðað í ljósi þess hvernig fer með losunarheimildir og greiðslur fyrir þær. Það hefur aldrei staðið til að tvískatta og að fyrirtækin greiði fullt kolefnisgjald og kaupi losunarheimildir til viðbótar. Það er beinlínis sagt að þetta verður endurskoðað.“

Steingrímur segir kolefnisgjöld vera umhverfisskatta og eiga að virka hvetjandi fyrir iðnaðinn til að þróa sínar tæknilausnir og draga úr losun. Vissulega sé líka horft til þess að þau afli tekna, ekki veiti af.

Samkvæmt heimildum Fréttablaðsins munu fara af stað viðræður á milli stjórnvalda og fulltrúa stóriðjunnar um hvernig hægt sé að koma í veg fyrir að samkeppnisstaða Íslands skaðist við kolefnisgjöldin. Fyrsti fundur verður á mánudag.

Steingrímur segir að ekki sé ætlunin að gjöldin verði meira íþyngjandi hér en búast megi við að þau verði í öðrum löndum. Verkefnið sé að útfæra í einstaka tilvikum samhengið á milli kolefnisgjaldanna og þess sem fyrirtækin greiða fyrir losunarheimildir.

kolbeinn@frettabladid.is