Sýndi að það er ekki þörf á nýjum sóknarmanni

Kolbeinn Sigþórsson lék eftir 28 ára gamalt afrek Atla Eðvaldssonar þegar hann skoraði fimm mörk í 6-1 sigri AZ Alkmaar á VVV Venlo í hollensku úrvalsdeildinni um helgina.

Atli skoraði öll fimm mörkin í 5-1 sigri Fortuna Düsseldorf á Eintracht Frankfurt í þýsku úrvalsdeildinni árið 1983 og hlaut mikið lof fyrir.

Það sem meira er þá skoraði Jóhann Berg Guðmundsson eina mark AZ sem Kolbeinn skoraði ekki í leiknum um helgina. Öll sex mörk AZ í leiknum voru því íslensk.

„Jú, þetta vakti mikla athygli og okkur var báðum mikið hrósað eftir leikinn,“ sagði Kolbeinn í samtali við Fréttablaðið í gær. „Það er líka gaman að því að hafa jafnað þetta afrek hjá Atla og að hafa skrifað kafla í söguna. Ég vona bara að ég haldi áfram að skora þó svo að það verði ekki alltaf fimm mörk í sama leiknum.“

Kolbeinn skoraði mörkin með fjölbreyttum hætti. Tvö með hægri fæti, tvö með vinstri og eitt með skalla. Sjálfur segist hann hafa fengið þau skilaboð frá þjálfaranum að hann yrði að skora í leiknum.

„Fólk var ekki ánægt eftir síðustu tvo leiki okkar og þjálfarinn sagði að ég yrði að skora. Það gaf mér aukakraft fyrir leikinn þó svo að ég setji alltaf pressu á mig í hverjum leik. Ég vil alltaf skora – annars á ég ekkert erindi í sóknina,“ segir Kolbeinn.

„Það var líka gott að Jóhann hafi skorað svona glæsilegt mark eins og hann gerði. Það var skemmtilegur bónus.“

Kolbeinn hefur verið í byrjunarliði AZ síðan deildin hófst aftur eftir vetrarhlé. Hann skoraði ekki í tveimur fyrstu leikjunum í janúar en bætti fyrir það um helgina.

„Þeir seldu framherjann sem hefur verið að spila mikið til Parma á Ítalíu og því er þessi staða meira út af fyrir mig núna. Ég held að ég hafi sýnt þeim að þeir þurfi ekki að kaupa nýjan sóknarmann,“ sagði Kolbeinn. „Það hafa verið sögusagnir um það síðustu vikurnar en þjálfarinn segir að hann sé ekki að skoða neina leikmenn. En þótt svo væri eru þeir vonandi hættir við það núna.“

Samningur Kolbeins við AZ rennur út eftir næsta tímabil og hafa forráðamenn liðsins ekki enn rætt við hann um nýjan samning. „Ég mun einbeita mér fyrst og fremst að því að spila vel. Það er EM [U-21 liða í Danmörku] í sumar og ég ætla að vera í toppformi þar. Ég mun sinna mínu og framhaldið kemur svo bara í ljós.“

Þetta var sjöunda sinn sem Kolbeinn var í byrjunarliði AZ í deildarleik. Alls hefur hann skorað níu mörk í þeim 20 leikjum sem hann hefur komið við sögu. Hann er langmarkahæsti leikmaður liðsins með níu deildarmörk.

AZ fór upp í fimmta sæti deildarinnar með sigrinum en liðið er með 37 stig, tíu stigum minna en topplið PSV Eindhoven.