Vilja samstarfshóp um framtíðarstaðsetningu Gæslunnar

Stjórn Sambands sveitarfélaga á Suðurnesjum vill halda áfram hagkvæmnisgreiningu á flutningi Landhelgisgæslunnar til Suðurnesja. Þá vill stjórnin mynda samstarfshóp um málið þar sem sveitarfélögin á svæðinu og stjórnvöld eigi sæti.

Á samráðsvettvangi sveitarfélaga á Suðurnesjum og stjórnvalda í dag var lagt fram minnisblað um hagkvæmnisathugun vegna flutnings starfsemi Landhelgisgæslu Íslands til Suðurnesja. „Minnisblaðið er gott innlegg í umræðu um flutning Landhelgisgæslunnar en í minnisblaðinu er aðeins lagt mat á kostnað við verkefnið, þ.e.a.s. einskiptiskostnað og árlega hækkun rekstrarkostnaðar,“ segir í yfirlýsingu frá stjórninni.

„Ljóst er að mikilvægt er að halda áfram hagkvæmisgreiningu á flutningi Landhelgisgæslunnar þar sem farið er yfir hver sé framtíð Landhelgisgæslunnar og hagkvæmni flutnings fyrir bæði gæsluna og Suðurnes enda tekur minnisblaðið ekki á þeim framtíðarkostnaði er Landhelgisgæslan mun verða fyrir ef hún er áfram á þeim stað sem hún er í dag,“ segir ennfremur og bent á að líkt og komi fram í umræddu minnisblaði þá geti Landhelgisgæslan ekki vaxið þar sem hún er og húsnæði hennar er ófullnægjandi. „Stjórn SSS óskar því eftir því að myndaður verði samstarfshópur stjórnvalda og sveitarfélaga á Suðurnesjum til að halda áfram þessari hagkvæmnisgreiningu svo allar hliðar málsins liggi ljósar fyrir áður en ákvörðun verður tekin.“