Vilja breikka samstarfið

Talsverðar líkur eru á að ríkisstjórnin taki breytingum innan ekki langs tíma. Vilji er innan beggja stjórnarflokka til að breikka stjórnarsamstarfið með því að taka þriðja flokkinn til samstarfs. Sá vilji er ríkari meðal þingmanna Samfylkingarinnar, en innan VG heyrast einnig raddir þess efnis.

Samkvæmt heimildum Fréttablaðsins hafa Samfylkingarþingmenn um nokkurt skeið rætt í þröngum hópum um nauðsyn þess að styrkja stjórnina. Hjáseta þriggja þingmanna VG við afgreiðslu fjárlaga í desember varð til að ýta enn frekar undir þá skoðun Samfylkingarmanna. Mun Jóhanna Sigurðardóttir forsætisráðherra hafa léð máls á slíkum breytingum.

Innan flokksins er sú skoðun ráðandi að ekki beri að slíta samstarfinu við VG og efna til nýs samstarfs með öðrum flokki. Frekar beri að bjóða þriðja flokknum aðild að stjórninni. Í Samfylkingunni er í þeim efnum bæði horft til Sjálfstæðisflokksins og Framsóknarflokksins. Samkvæmt því sem Fréttablaðið kemst næst eru þeir fleiri sem telja gæfulegt að fá Sjálfstæðisflokkinn til samstarfs við stjórnina en Framsóknarflokkinn.

Í VG er það mat nú uppi að breikkun stjórnarsamstarfsins kunni að vera affarasælast fyrir land og þjóð. Tilraunir til að sætta málefnaágreining innan flokksins hafi ekki borið nægilegan árangur. Endurkoma Ögmundar Jónassonar í stjórnina á haustmánuðum var viðleitni í þá átt en hefur ekki skilað tilætluðum árangri. Úrsögn Atla Gíslasonar og Lilju Mósesdóttur úr þingflokknum dugi heldur ekki til. Enn sé ekki nægileg einurð um mikilvæg mál meðal þingmanna hans og stuðningur við frumvörp ekki tryggur. Í VG hugnast mönnum fremur samstarf við Framsókn en Sjálfstæðisflokk.

Ljóst er að verði ríkisstjórnin styrkt með aðild þriðja flokksins verður það aðeins að undangengnum ítarlegum málefnaviðræðum. Núverandi stjórnarflokkar munu þar halda fast í ýmis mál; Samfylkingin til að mynda í aðildarumsóknina að Evrópusambandinu.

Heimildir Fréttablaðsins herma einnig að forvígismenn bæði atvinnurekenda og launþega hafi haldið þeirri skoðun sinni að forsvarsmönnum ríkisstjórnarinnar að hana þurfi að styrkja. Mikilvægt sé að öflug ríkisstjórn starfi í landinu við þær erfiðu aðstæður sem ríki í samfélaginu. Í þeim herbúðum er talið heppilegt að Sjálfstæðisflokkurinn verði fenginn til samstarfs.

Jóhanna Sigurðardóttir og Steingrímur J. Sigfússon ræddu stöðu og framhald stjórnarsamstarfsins á sérstökum fundi áður en ríkisstjórnarfundur hófst í gærmorgun. Samkvæmt upplýsingum Fréttablaðsins voru breytingar á stjórninni ekki ræddar sérstaklega en farið yfir helstu áherslumálin fram undan. Þau eru kjarasamningar og fyrirhugaðar breytingar á fiskveiðistjórnunarkerfinu.- bþs