Grímuklætt par rændi söluturn í Breiðholti

Ungt par rændi peningum úr söluturni í Breiðholti í gærkvöldi. Parið snaraðist þar inn rétt fyrir klukkan hálf tólf, en þá er söluturninum að venju lokað. Bæði voru grímuklædd og vopnuð bareflum.

Þegar afgreiðslumaður varð ekki strax við kröfu þeirra um peninga, braut karlmaðurinn gler í afgreiðsluborði og hótaði að berja starfsmanninn, sem afhenti honum þá peningana úr sjóðsvélinni, eða peningakassanum.

Að því búnu hljóp fólkið í sitthvora áttina en afgreiðslumaðurinn hringdi á lögreglu, sem greip konuna á hlaupum og vistaði hana í fangageymslum, en karlmannsins er leitað. Ekki er vitað hver konan er því hún neitar að gefa upp nafn og var ekki með nein skilríki á sér.