Sáust síðast á ferju til Korsíku

Leitin að sex ára tvíburasystrum frá Sviss barst í gær til Korsíku og sunnanverðrar Ítalíu, eftir að staðfesting fékkst á því að þær hefðu verið um borð í ferju til Korsíku fjórum dögum áður en faðir þeirra svipti sig lífi á Ítalíu.

Faðirinn, Matthias Kaspar Schepp, fannst látinn 3. febrúar í Cerignola á Ítalíu, en hafði áður sést bæði á Korsíku og í Napolí. Lögreglan segir hann hafa fleygt sér fyrir járnbrautarlest.

Leitað hefur verið að stúlkunum síðan þær hurfu frá heimili sínu í Sviss 30. janúar.- gb