Bjartsýnir á nýjan kjarasamning í dag

Skriður komst á kjaraviðræður í gærdag og var fundað í flestum herbergjum í húsakynnum Ríkissáttasemjara fram til miðnættis. Menn voru bjartsýnir á að hægt verði að skrifa undir nýja kjarasamninga eftir hádegi í dag, en fundir hefjast á ný klukkan eitt.

Stefnt er að þriggja ára samningi með forsenduákvæðum sem snúa að ríkisstjórninni. Gangi þær forsendur ekki eftir fyrir júní lok verður um árs samning að ræða.

Fulltrúar stjórnvalda komu til Ríkissáttasemjara um klukkan ellefu í gærkvöldi en höfðu fátt nýtt fram að færa að mati samningamanna. Í þeim drögum sem rædd hafa verið hingað til er gert ráð fyrir að launafólk fái 50 þúsund króna eingreiðslu við undirritun samninga. Þá hafði áður verið rætt um að laun hækkuðu um tíu prósent á þriggja ára samningstímabili og á samningstímanum hækkuðu lágmarkslaun upp í 200 þúsund krónur.

Þetta dugði forystu verkalýðshreyfingarinnar ekki lengur í gær og buðu Samtök atvinnulífsins þá eitt prósentustig til viðbótar. Það kemur í ljós við undirritun samninga í dag, hvort það varð niðurstaðan í gærkvöldi eða hvort verkalýðsforystunni tókst að knýja fram enn meiri hækkun. Ef aðilar vinnumarkaðarins eru sáttir við aðgerðir stjórnvalda í tengslum við samninga í lok júni ná samningarnir til þriggja ára annars verður um eins árs samning að ræða.

Ríkisstjórnin hefur ákveðið að halda auka ríkisstjórnarfund á morgun þar sem reyna á að afgreiða frumvarp Jóns Bjarnasonar sjávarútvegsráðherra um breytingar á lögum um stjórn fiskveiða til þingflokka.

Frumvarpið ræður miklu um það hvernig Samtök atvinnulífsins meta stöðu mála, en einnig skiptir miklu máli fyrir aðila beggja megin samningaborðsins hvernig tekst til að auka atvinnu og hagvöxt með aðgerðum stjórnvalda.