Norsku landsliðsmennirnir ánægðir með HM-dráttinn

Norsku landsliðsmennirnir Jonathan Parr, Espen Bugge Pettersen og Simen Brenne voru afar ánægðir með HM-dráttinn þegar norska Dagblaðið talaði við þá í gær. Norðmenn eru í riðli með Íslandi, Kýpur, Albaníu, Sviss og Slóveníu.

„Við eigum möguleika á að vinna öll þessi lið. Slóvenía og Sviss verða samt erfiðir mótherjar. Ég er bjartsýnn og við fáum frábært tækifæri til að komast á HM," sagði Simen Brenne, miðjumaður hjá Odd Grenland.

„Við eigum flotta möguleika á því að komast áfram. Við mætum góðkunningjum okkar eins og Íslandi og við gátum varla komist nær því að lenda í draumariðli. Sviss og Slóvenía verða erfið, sérstaklega á útivelli, en þetta er góður dráttur fyrir okkur. Noregur á góða möguleika á því að komast á HM," sagði Espen Bugge Pettersen markvörður hjá Molde.

„Þetta er mjög áhugaverður riðill. Það er alltaf erfitt að komast upp úr riðli í undankeppni en við hefðum getað lent í mun erfiðari riðli. Ég er sáttur og Noregur á góða möguleika á því að taka efsta sætið," sagði  Jonathan Parr, vinstri bakvörður sem leikur með Crystal Palace í ensku B-deildinni.