Þjálfari Sviss: Vill bjóða Ronaldo út að borða fyrir að draga Sviss í E-riðil

Ottmar Hitzfeld, þjálfari svissneska landsliðsins, var mjög sáttur með því að lenda í riðli Íslendinga í undankeppni HM 2014 en auk Sviss og Íslands eru í riðlinum Noregur, Slóvenía, Kýpur og Albanía.

Í viðtali við svissneska blaðið Tages Anzeiger vildi Ottmar Hitzfeld þakka Ronaldo fyrir að draga Sviss í E-riðilinn. Ronaldo dróg Sviss, Slóveníu og Noreg í E-riðilinn en Paulo Henrique Ganso, stjörnuleikmaður Santos, hafði áður dregið Ísland, Kýpur og Albaníu í E-riðilinn.

„Ég hefði viljað bjóða Ronaldo út að borða fyrir þennan drátt," sagði Ottmar Hitzfeld.

„Þetta hefði getað verið mikið mikið verra. Við sluppum við að mæta Rússlandi og Frakkalandi úr öðrum styrkleikaflokki og við sluppum við að mæta Spáni, Hollandi, Þýskalandi, Englandi og Ítalíu úr fyrsta styrkleikaflokknum," sagði Hitzfeld.