Eiður Smári náði ekki að skora í leik númer tvö með AEK

Eiður Smári Guðjohnsen og félagar í AEK léku í gær æfingaleik við serbneska liðið FK Rad Belgrade og lauk leiknum með 1-1 jafntefli. Þetta var síðasti leikur liðsins í æfingaferðinni til Slóveníu.

Eiður Smári fékk tvö góð færi þær 52 mínútur sem hann spilaði í leiknum en tókst ekki að skora ekki frekar en í fyrsta leik sínum með AEK.

AEK lenti undir í leiknum eftir 20 mínútur en Kamerúnmaðurinn Steve Leo Beleck jafnaði leikinn á 33. mínútu með skalla eftir sendingu frá Nikolaos Karabelas.

Eiður Smári var tekinn útaf á 52. mínútu og Elfar Freyr Helgason kom inn á sem varamaður fimm mínútum síðar. Íslendingarnir tveir í AEK-liðinu eiga því enn eftir að spila saman á vellinum.