Fékk loksins trúlofunarhring eftir 65 ára hjónaband

Bandaríkjamaðurinn Everett Potter á skammt eftir ólifað og hans hinsta ósk var að gefa eiginkonu sinni til 65 ára trúlofunarhring. Everett hafði nefnilega ekki efni á að kaupa einn slíkan á sínum tíma.

Heilsu Everetts, sem er 97 ára, hefur hrakað mjög að undanförnu og telja læknar að hann eigi ekki langt eftir ólifað. Everett ákvað því að gleða eiginkonuna Betty á dögunum og lagði hart að henni að þau myndu endurnýja hjúskaparheitin. Það var þá sem Everett gaf Betty hringinn góða. Um veglegan hring er að ræða og var Betty hin glaðasta með eiginmanninn.