AZ hélt toppsætinu í Hollandi - Jóhann Berg kom inná sem varamaður

AZ Alkmaar vann frábæran sigur, 2-1, á Feyenoord í hollensku úrvalsdeildinni í dag. AZ hélt þar með í toppsætið í deildinni.

Feyenoord skoraði fyrsta mark leiksins í fyrri hálfleiknum, en þar var að verki Otman Bakkal. AZ Alkmaar gerði síðan tvö mörk í þeim síðari og náði í þrjú frábær stig.

Rasmus Elm og Brett Holman gerðu sitt markið hver fyrir Aljmaar, en sigurmarkið kom þegar fimm mínútur voru til leiksloka.

Jóhann Berg Guðmundsson kom inná sem varamaður  í liði AZ þegar 15 mínútur voru til leiksloka.

AZ Alkmaar er í efsta sæti deildarinnar með 18 stig en liðið hefur sigrað sex leiki á tímabilinu og tapað einum.

Kolbeinn Sigþórsson og félagar í Ajax gerðu jafntefli, 1-1, við Twente í gær og komst Kolbeinn ekki á blað. Ajax er enn taplaust í deildinni í ár en hafa aftur á móti gert þrjú jafntefli. Liðið er því í þriðja sæti með 15 stig.