Petr Cech bjargaði Chelsea og varði víti - Eiður Smári með fína takta

Petr Cech var hetja Englandsmeistaraliðs Chelsea þegar hann varði víti á lokamínútunni gegn Fulham. Cech sá við bandaríska landsliðsmanninum Clint Dempsey sem tók vítið en ekkert mark var skorað í leiknum. Eiður Smári Guðjohnsen kom inná sem varamaður á 82. mínútu og hann var greinilega staðráðinn í því að sýna hvað í honum býr.

Chelsea er í fimmta sæti með 45 stig, Tottenham er þar fyrir ofan með 47, Manchester City í því þriðja með 49. Manchester United er efst með 57 og Arsenal er með 53 í öðru sæti. Fulham er í 12. sæti með 31 stig.

David Luiz, sem nýverið var keyptur til Chelsea fyrir 25 milljónir punda, braut á Dempsey þegar þrjár mínútur voru liðnar af uppbótartímanum.

Eiður Smári lét strax finna fyrir sér með hörkutæklingu sem minnti um margt á tilþrif knattspyrnustjórans Mark Hughes á árum áður. Florent Malouda fékk að kenna á því og var Eiður reyndar heppinn að fá ekki gult spjald fyrir þessi tiþrif.

Eiður sýndi svipaða takta örskömmu síðar og hann hefur eflaust vakið athygli knattspyrnustjórans Hughes á þessum stutta tíma sem hann fékk að spreyta sig.

Eins og áður segir náði Dempsey ekki að skora úr vítaspyrnunni en Danny Murphy vítaskytta liðsins var farinn af leikvelli. Eiður var mættur í vítateiginn þegar boltinn barst út í teiginn eftir að Cech hafði varið.

Dempsey ákvað hinsvegar að sýna sparihliðarnar og reyndi að skjóta á markið úr bakfallsspyrnu - og sú tilraun var skelfileg. Eiður var í mun betra færi og hefði eflaust viljað fá boltann í þessu færi gegn sínu gamla liði.

Fernando Torres var í fremstu víglínu hjá Chelsea en hann náði sér ekki á strik og hann á enn eftir að skora fyrir Chelsea eftir að hann var keyptur fyrir rúma 9 milljarða kr. frá Liverpool. Torres fór af leikvelli á 62. mínútu og Didier Drogba kom inná sem varamaður.



Staðan í deildinni.