Brian Cowen gefur ekki kost á sér í komandi þingkosningum

Brian Cowen forsætisráðherra Írlands segir að hann muni ekki gefa kost á sér í komandi þingkosningum í landinu.

Í síðasta mánuði lét Cowen af embætti sem formaður Fiana Fail flokksins en sagðist áfram ætla að stjórna landinu fram að kosningunum.

Talið er líklegt að þing landsins verði leyst frá störfum í dag og að kosningarnar fari hugsanlega fram í þessum mánuði.

Cowen segir að hann hafi tekið ákvörðun um að hætta í stjórnmálum að vel yfirlögðu ráði og eftir að hafa rætt við fjölskyldu sína, nána vini og samherja.