Knattspyrnufélög Evrópu ósátt við FIFA

Þjóðverjinn Karl-Heinz Rummenigge, formaður samtaka evrópskra félagsliða (ECA), vill að félögin standi fyrir byltingu gegn spilta fólkinu sem ræður ríkjum hjá FIFA eins og Rummenigge orðaði það.

ECA-samtökin voru stofnuð í stað G14 hreyfingarinnar sem leiðandi afl knattspyrnufélaga í Evrópu. Meðal félaga í samtökunum eru Manchester United, Chelsea, Arsenal og Liverpool.

„Ég hef fengið mig fullsaddan af því að okkur sé stjórnað af fólki sem tekur hlutina ekki alvarlega og er óheiðarlegt. Nú er tíminn til þess að grípa í taumana. Ef þú veist að eitthvað er rangt ertu skuldbundinn til þess að breyta,“ sagði Rummenigge.

Þrátt fyrir að ECA-samtökin séu samtök stóru liðanna í Evrópu segir Rummenigge þetta vera skoðun allra félaga í Evrópu. Hann segir óánægjuna mesta í Þýskalandi, Sviss og Englandi en hann ræddi nýlega við Hugh Robertson íþróttamálaráðherra Breta.

Rummenigge hefur enga trú á því að knattspyrnusamböndin láti FIFA heyra það.

„Ég hef enga trú á því. Kerfið er sett upp samböndunum í hag og það eru samböndin sjálf sem kjósa. Þau munu ekki mótmæla FIFA.“

Þá bætti Rummenigge við sinni persónulegu skoðun að landslið væru látin spila allt of marga landsleiki í núverandi fyrirkomulagi.

„Þegar við urðum Evrópumeistarar árið 1980 voru átta lið í úrslitakeppninni. Liðafjöldin hefur þrefaldast. Á HM voru 16 lið en nú eru 32. Það eru félögin sem greiða leikmönnum laun. Samt höfum við ekkert um málið að segja.“