Stóra leyndarmálið um markverði í vítakeppnum afhjúpað

Hópur vísindamanna í Hollandi hefur sett fram skemmtilega kenningu sem margir fótboltaþjálfarar eiga eflaust eftir að nýta sér í framtíðinni. Samkvæmt niðurstöðu rannsóknar sem sérfræðingarnir gerðu eru meiri líkur á því að markverðir skutli sér til hægri í vítaspyrnum sem framkvæmdar eru við hátt spennustig í úrslitaleikjum eða vítaspyrnukeppnum.

Hollendingarnir telja sig hafa sannað það að það sé eðlislægt hjá manneskjum að skutla sér til hægri undir slíkum kringumstæðum. Hinsvegar benda vísindamennirnir einnig á að við „venjulegar" aðstæður séu meiri líkur á því að markverðir skutli sér til vinstri þegar kemur að vítaspyrnum.

Að sjálfsögðu ætla Hollendingarnir að miðla þekkingu sinni til hollenska knattspyrnusambandsins en talið er að Englendingar séu tilbúnir að greiða háa fjárhæð fyrir þessar upplýsingar – enda er saga enska landsliðsins í vítaspyrnukeppnum á stórmótum ein sorgarsaga.

Enska landsliðið var að sjálfsögðu hluti af rannsóknarvinnu hollensku vísindamannana. Vítaspyrnukeppni Englands og Portúgals frá HM 2006 var þar tekin fyrir. Þar skoraði Cristiano Ronaldo framhjá Paul Robinson markverði enska landsliðsins – en hann skutlaði sér til hægri í því tilviki en virtist í fyrstu ætla að veðja á rétt horn, það vinstra.

Marieke Roskes, talsmaður hollensku vísindamannana, segir að í því tilviki, hafi hægra heilahvelið hjá Robinson tekið völdin og ákveðið að hann ætti að fara til hægri. „Niðurstöðurnar eru áhugaverðar og við vonum að við getum hjálpað hollenska landsliðinu til þess að fara alla leið á næsta Heimsmeistaramóti," sagði Roskes.

Kenningin er skemmtileg en eflaust eru skiptar skoðanir um hvernig túlka beri niðurstöðurnar.