Um 400 flóttamönnum frá Líbíu bjargað

Strandgæslan á Ítalíu bjargaði 400 flóttamönnum frá Líbíu í morgun eftir að fiskibátur sem þeir voru á steytti á skeri við smáeyjuna Lampedusa.

Fréttastofa BBC segir að margir flóttamannanna hafi stokkið úr bátnum eftir að slysið varð eða jafnvel dottið í sjóinn. Sumum þeirra tókst þó að halda sér í kaðla sem voru bundnir í bátinn og halda sér þannig um borð þar til strandgæslan kom og bjargaði þeim. Benedikt sextándi páfi hvatti heimsbyggðina í morgun til þess að sýna flóttamönnum frá Afríku umburðarlyndi.

Flóttamenn hafa ferðast reglulega frá Líbíu til Lampedusa að undanförnu. Til dæmis komu 760 manns þangað þann 19. apríl síðastliðinn.