Munu leita til félagsdóms

Félag leikskólakennara mun leita til félagsdóms ef ekki kemst á hreint hversu langt leikskólastjórar mega ganga til að halda leikskólum opnum í boðuðu verkfalli leikskólakennara, sem hefst að óbreyttu á mánudag.

Haraldur Freyr Gíslason, formaður félagsins, segir umræðuna um það hvort leikskólastjórnendum og ófaglærðu starfsfólki sé heimilt að manna stöður kennara í verkfalli eingöngu styrkja bakland leikskólakennara.

„Ef verkfallsreglur verða brotnar munum við sinna verkfallsvörslu af fullum krafti. Og ef lagaleg túlkun verður áfram mismunandi, ef ekki mun liggja fyrir nein dómsniðurstaða eða lög sem taka á þessu, verður bara að láta á það reyna fyrir félagsdómi.“

„Ég fæ ekki séð hvernig hægt er að halda deildum opnum nema með því að hvetja til verkfallsbrota, sem almennt er ekki talinn góður stjórnunarháttur,“ segir Erna Guðmundsdóttir, lögmaður Félags leikskólakennara.

Halldór Halldórsson, formaður Sambands íslenskra sveitarfélaga (SÍS), segir það lagalegt álitamál hvort stjórnendum leikskóla beri að sinna þeim deildum sem muni lokast í verkfallinu.

„Við efumst ekki um að okkar álit sé rétt. En það eru auðvitað virtir aðilar hinum megin, þannig að klárlega er þetta álitamál,“ segir hann.

Leikskólakennarar krefjast ellefu prósenta launaleiðréttingar til viðbótar við sambærilegar hækkanir og aðrir launamenn hafa samið um. Ekkert hefur þokast í kjaraviðræðum síðustu daga.

Reykjavíkurborg greiðir nú leikskólakennurum umfram það sem kveður á um í kjarasamningi. Oddný Sturludóttir, formaður menntaráðs Reykjavíkurborgar, segir það svíða ef til verkfalls komi, meðal annars í ljósi þeirra aðgerða borgarinnar til að koma til móts við leikskólakennara.

„Síðastliðinn vetur lögðum við allt í sölurnar til að verja þessi kjör, meðal annars með sameiningum í yfirstjórn, niðurlagningu heimgreiðslna og fleiri hagræðingaraðgerðum,“ segir Oddný. „Við erum ánægð með að hafa getað varið kjör leikskólastarfsfólks en auðvitað svíður öllum að hugsanlegt verkfall bitni á leikskólabörnum, fjölskyldum þeirra og leikskólastarfi í landinu.“