Noregur fór létt með Ungverjaland

Noregur vann í dag auðveldan 6-0 sigur á Ungverjalandi í riðli Íslands í undankeppni EM 2013. Þær norsku eru því komnar á blað í riðlinum eftir að hafa tapað fyrir Íslandi, 3-1, um síðustu helgi.

Noregur er helsti keppinautur Íslands um sæti í úrslitakeppni EM og var því sigur Íslands um helgina sérstaklega mikilvægur. Norðmenn sýndu þó í dag að þær ætla hvergi að gefa eftir og unnu sannfærandi sigur á Ungverjalandi.

Sóknarmaðurinn Isabell Herlovsen skoraði tvö mörk fyrir Noreg í leiknum og fyrirliðinn Ingvild Stensland, sem skoraði mark Norðmanna gegn Íslandi, skoraði eitt. Marita Lund, Solfried Andresen og Gry Tofte Ims skoruðu hin mörk Norðmanna.

Landsliðsþjálfari Noregs var mjög óánægð með sína leikmenn eftir leikinn um helgina en gerði engu að síður aðeins tvær breytingar á byrjunarliði sínu í dag.

Ísland mætir Belgíu á Laugardalsvelli í kvöld klukkan 19.30. Um helgina unnu Belgar 2-1 sigur á Ungverjalandi á heimavelli.