KSÍ meðal 53 knattspyrnusambanda sem fordæma aðgerðir Sion

Formenn knattspyrnusambandanna 53 sem mynda Knattspyrnusamband Evrópu, UEFA, funda nú á Kýpur og þau hafa tekið sig saman um að fordæma aðgerðir svissneska félagsins Sion. Knattspyrnusamband Íslands er að sjálfsögðu í þessum hópi.

UEFA henti Sion-liðinu út úr Evrópudeildinni þar sem að svissneska félagið braut félagsskiptabannið sem UEFA hafði áður dæmt Sion í. Sion hafði slegið út Celtic í forkeppni Evrópudeildarinnar en skoska félagið fékk síðan sæti Sion eftir úrskurð UEFA.

Svisslendingarnir voru ekki sáttir með þetta og höfðuðu mál á hendur UEFA þar sem þeir kröfðust þess að fá að halda sínu sæti í Evrópudeildinni. Sion og UEFA koma fyrir dómara í næstu viku.

Knattspyrnusamböndin sem tilheyra UEFA hafa fordæmt þessar aðgerðir Sion-manna og segja að þau félög sem sætta sig ekki við reglur UEFA ættu ekki að taka þátt í keppnum á vegum evrópska knattspyrnusambandsins.