Stelpurnar áttu stúkuna á Sükrü Saracoglu

Karlmenn fengu ekki inngang á leik Fenerbahce og Manisaspor í tyrknesku deildinni sem fram fór á Sükrü Saracoglu leikvanginum í gærkvöldi en Fenerbahce tók þá út bann vegna óláta áhorfenda í sumar.

Tyrkneska sambandið ákvað hinsvegar að falla frá því að leikurinn færi fram fyrir luktum dyrum og leyfði konum og börnum að mæta á leikinn til að minna á fegurðina á bak við fótboltann eins og forráðamenn sambandsins komust að orði.

Fenerbahce gaf í framhaldinu konum og börnum þeirra miða á leikinn og þær nýttu tækifærið og fjölmenntu á leikinn. Alls voru 40 þúsund manns á leiknum sem endaði með 1-1 jafntefli. Stelpurnar áttu því svo sannarlega stúkuna á Sükrü Saracoglu leikvanginum.

Fjölmiðlar sýndu þessum sögulega leik líka mikinn áhuga, það er hægt að sjá myndband frá leiknum með því að smella hér fyrir ofan og hér fyrir neðan má sjá myndir frá leiknum sem ljósmyndarar AP og AFP tóku í Istanbul í gær.