Segist bera ábyrgð á árás

Doku Umarov, einn téténsku stríðsherranna sem enn berjast fyrir aðskilnaði Téténíu frá Rússlandi, segist bera ábyrgð á sprengjuárásinni á Domodedovo-flugvelli nálægt Moskvu í síðasta mánuði.

Árásin kostaði 36 manns lífið. Rannsókn leiddi í ljós að tvítugur maður frá Kákasushéruðum Rússlands hafði sprengt sig þar í loft upp.

Á myndbandi, sem birt var á mánudag, hótar Umarov fleiri árásum af þessu tagi. Hann hefur áður lýst yfir ábyrgð á hryðjuverkum í Rússlandi, þar á meðal sprengjuárásum í jarðlestakerfi Moskvu í mars á síðasta ári.- gb