Lag Sigurjóns verður áfram í keppninni

Tónlistarmaðurinn Sigurjón Brink, sem varð bráðkvaddur á heimili sínu á mánudag, var einn þeirra lagahöfunda sem áttu lag í Söngvakeppni Sjónvarpsins í ár. Sigurjón hafði skilað inn upptöku af laginu, þar sem hann syngur sjálfur, en eiginkona hans Þórunn Erna Clausen samdi textann.

Um tíma var óljóst hvort lagið yrði dregið úr keppni, en í samráði við fjölskyldu og vini Sigurjóns var ákveðið að lagið verði flutt í síðasta undanúrslitaþætti keppninnar næstkomandi laugardag. Ekki er ljóst hver mun syngja lagið, sem ber heitið, Aftur heim.