Árás markvarðar í leik rannsökuð sem morðtilraun - myndband

Markvörður u19 ára landsliðs Brasilíu í fótbolta gæti átt yfir höfði sér ákæru um morðtilraun eftir að hann sparkaði með fólskulegum hætti í hálsinn á Elivelton leikmanni Vasco da Gama. Markvörðurinn, Gustavo, var leikmaður Sport Recife, en forráðamenn liðsins ráku hann úr liðinu eftir að myndband af atvikinu fór eins og eldur í sinu á veraldarvefnum.

Dómari leiksins blés leikinn af þegar slagsmálin brutust út og Elivelton var fluttur með hraði á sjúkrahús. Í fyrstu var talið að meiðsli hans væri alvarleg en eftir rannsókn á sjúkrahúsi reyndust meiðslin ekki eins mikil og óttast var í fyrstu.

Árásin er komin inn á borð til lögreglu og hafa margir leikmenn verið yfirheyrðir. Talsmaður lögreglunnar segir að málið sé litið alvarlegum augum og rannsakað sem tilraun til manndráps.