Eiður Smári fékk fína dóma fyrir fyrsta leikinn með AEK

Eiður Smári Guðjohnsen fékk fína dóma fyrir fyrsta leik sinn fyrir AEK Aþenu í gær en hann spilaði þá fyrri hálfleikinn í markalausu jafntefli á móti tyrkneska liðinu Karabükspor.

Grískir fjölmiðlar hrósuðu Eiði sérstaklega fyrir fyrsta hálftímann í leiknum þar sem hann var mikið í boltanum og sýndi þeim að þar færi heimsklassaleikmaður.

Ora gia Sport blaðið sló upp frammistöðu Eiðs Smára á forsíðu sinni. Útsendari blaðsins skrifaði meðal annars um það að Eiður Smári hafi sýnt að hann sé í öðrum klassa en aðrir leikmenn AEK og að hann hafi oft dansað með boltann á vellinum.

Grísku blöðin kölluðu líka eftir meiri aðstoð fyrir Eið Smára, bæði í sókninni en ekki síst á miðjunni sem þótti ekki öflug í þessum leik.