Kolbeinn skoraði er PSV og Ajax skildu jöfn

Kolbeinn Sigþórsson skoraði fyrra mark Ajax frá Amsterdam er liðið gerði jafntefli við PSV Eindhoven á útivelli í hollensku úrvalsdeildinni í morgun.

PSV komst tvívegis yfir í leiknum en Kolbeinn jafnaði metin í fyrra skiptið með marki í uppbótartíma fyrri hálfleiks.

Reyndar var fimmtán mínútum bætt við fyrri hálfleikinn þar sem að Przemyslaw Tyton, leikmaður PSV, meiddist mjög illa.

Kolbeinn skoraði markið af miklu harðfylgi en hann vann boltann af varnarmanni áður en hann kom sér fram hjá tveimur til viðbótar og sendi boltann yfir markvörð PSV.

Heimamenn voru reyndar mjög ósáttir við að markið hafi fengið að standa þar sem þeir töldu að Kolbeinn hafi brotið á leikmanni PSV í aðdraganda marksins.

Kolbeinn var í byrjunarliði Ajax en var skipt af velli á 62. mínútu.

Ajax er því enn taplaust á toppi deildarinnar með fjórtán stig eftir sex umferðir, rétt eins og Feyenoord. PSV er svo í fimmta sætinu með ellefu stig.