Nýtt frumvarp um RÚV lagt fram á vormánuðum

Stjórnvöld hafa farið fram á frest til aprílloka til að gera þær úrbætur á rekstar- og lagaumhverfi Ríkisútvarpsins (RÚV) sem ESA, eftirlitsstofnun EFTA fór fram á í síðasta mánuði. Beiðni stjórnvalda og skýringar á stöðu málsins voru sendar ESA í gær.

Í ákvörðun ESA frá 9. febrúar síðastliðnum er kveðið á um margvíslegar breytingar á lagaumhverfi og fjármögnun RÚV. Til að mynda er kveðið á um aðskilnað samkeppnisreksturs og almannaþjónustu í starfsemi RÚV. Þannig megi stofnunin ekki nota almannafé til þess að beita sér í samkeppnishamlandi aðgerðum á markaði.

Í frétt Fréttablaðsins um málið 11. febrúar sagði Páll Magnússon útvarpsstjóri tilmæli ESA engin áhrif hafa á rekstur RÚV. Þau sneru að stjórnvöldum en ekki stofnuninni. „Ef það eru einhverjir tæknilegir misbrestir hjá okkur verða þeir lagaðir, en þetta hefur ekkert með daglegan rekstur RÚV að gera," sagði hann þá.

Þegar hefur verið komið til móts við sumar athugasemdir ESA, svo sem með því að færa eignarhald RÚV frá mennta- og menningarmálaráðuneyti til fjármálaráðuneytisins, sem í gær svaraði ákvörðun ESA.

Mennta- og menningarmálaráðuneytið fer eftir sem áður með eftirlit með útsendingarstarfsemi, þótt skilið hafi verið á milli þess eftirlits og eignarhaldsins.

Katrín Jakobsdóttir, mennta- og menningarmálaráðherra, segir að í bréfinu til ESA stöðu málsins lýst. „Í raun og veru er sagt að við séum ekki búin að uppfylla tilmælin en vísað til þess að fjölmiðlafrumvarpið sé ennþá í umræðu," segir hún, en það var afgreitt úr menntamálanefnd þingsins á þriðjudag og verður fljótlega á dagskrá þingsins. „Í því er komið til móts við ákveðnar athugasemdir, svo sem með því að setja á laggirnar þessa fjölmiðlanefnd sem á að hafa eftirlit með framkvæmd RÚV á útvarpsþjónustu í almannaþágu."

Auk þess segir Katrín í bréfinu vísað til nefndar sem hún stofnaði til að fara yfir lögin um Ríkisútvarpið ohf. og á að skila af sér frumvarpsdrögum í maí. Stefnt er að því að breyta lögunum á yfirstandandi þingi.„Í erindisbréfinu er sérstaklega kveðið á um að nefndin skoði þennan aðskilnað sem kveðið er á um milli samkeppnisreksturs og útvarpsreksturs í almannaþágu," segir hún, en nefndin var skipuð fyrir um hálfum mánuði.

olikr@frettabladid.is