Fróaði sér fyrir framan þrjár skólastúlkur

Þrjár stúlkur úr tíunda bekk í Engjaskóla urðu fyrir því á heimleið úr skólanum á þriðjudagsmorgun að ungur maður sem þeir mættu á göngustíg hafði í frammi kynferðislega tilburði við þær.

Maðurinn beraði kynfæri sín og fróaði sér fyrir framan þær. Ein stúlknanna greip þá til farsíma síns og þegar maðurinn sá það lét hann sig hverfa á brott.

Skólastjóri Engjaskóla, Jóhanna S. Vilbergsdóttir, sendi forráðamönnum barnanna í skólanum viðvörun vegna þessa atburðar í gær.

„Stúlkurnar voru á leið niður göngustíg norðan við skólann sem liggur niður að söluturni, þegar maðurinn varð fyrir þeim,“ útskýrir Jóhanna.

Stúlkurnar gátu lýst manninum, sem þær segja að sé um tvítugt, meðalmaður að hæð, klæddur grænni hettupeysu og svartri úlpu með mjög dökkar augnbrúnir.

„Við höfum komið málinu til lögreglu en biðjum ykkur um að ræða við börn ykkar um að hafa varann á í hvívetna og láta vita strax ef þau verða einhvers vör,“ segir í viðvörunarskeytinu.

Jóhanna segir fólk á varðbergi vegna manna sem virðist hafa stundað áreiti í grennd við skólann. Fyrir rúmri viku hafi tveir menn á svörtum bíl reynt að lokka tvo drengi upp í bílinn í Engjahverfi.

Síðastliðinn föstudag hafi tveggja manna á dökkum bíl aftur orðið vart á bílastæði í hverfinu þar sem þeir reyndu að tæla lítinn dreng upp í bílinn með Playstation-3 tölvu. Auk þessa hafði áður verið tilkynnt þrisvar um menn á dökkum bíl sem reyndu að lokka börn upp í hann með gylliboðum. - jss