Varaformannsslagur í uppsiglingu

Svo kann að vera að kosið verið um embætti varaformanns Framsóknarflokksins á flokksþingi sem haldið verður þann 9. apríl næstkomandi. Birkir. J. Jónsson varaformaður mun gefa kost á sér áfram, líkt og formaður flokksins og ritari hans. Vigdís Hauksdóttir, þingmaður Framsóknarflokksins, íhugar varaformannsframboð.

„Ég hef verið hluti samheldinnar forystu síðastliðin tvö ár og átt gott samstarf við framsóknarfólk og stefni því ótrauður af því að halda áfram sem varaformaður Framsóknarflokksins," segir Birkir J. Jónsson í samtali við Vísi.

Í samtali við Reykjavík síðdegis á Bylgjunni í dag sagðist Vigdís Hauksdóttir hvorki vilja játa því né neita að hún myndi gefa kost á sér í embættið. „Ef það skapast þannig svigrúm og það sé eftispurn eftir því að ég verði varaformaður flokksins þá bregst ég ekki flokksmönnum með það," segir Vigdís.

Vigdís segist þó hafa nægan tíma til að hugsa málin. „Flokksþingið er ekki fyrr en 9. apríl og ef mér hugnast þá hef ég allan þann tíma til að gefa kost á mér," segir Vigdís. Hún ætli að hugsa málin í rólegheitum.