Ráðherrabeytingarnar allherjar farsi

„Þetta er náttúrlega bara einn allsherjar farsi miðað við fréttir síðustu daga," segir Kristján Þór Júlíusson, þingmaður Sjáflstæðisflokksins, um fyrirhugaðar tilfæringar í ráðherraliði ríkisstjórnarinnar.

Fyrr í dag var fullyrt á vefmiðlinum www.smugan.is að Árni Páll og Jón Bjarnason myndu hverfa úr ríkisstjórn á morgun. Þá hefur og komið fram að síðustu daga hafi ríkisstjórnin átt viðræður við þingflokk Hreyfingarinnar til að leita eftir auknum styrk og stuðningi.

Kristján setur þetta tvennt í samhengi. „Þarna er ríkisstjórnin að ræða við hluta stjórnarandstöðunnar og gefa afslátt af eigin stjórnarsáttmála til að tryggja sér stuðning við að gera breytingar á ráðherraliði sínu. Það er það sem mér finnst ömurlegast við að horfa upp á þetta."

Kristján tekur þó fram að hann viti ekki frekar en aðrir hvað sé satt og logið eða hvernig þetta fer að lokum. „En svona birtist manni þetta í fréttum dagsins."

Báðir stjórnarflokkarnir hafa boðað til þingflokksfunda á morgun en þar verða þessi mál að öllum líkindum ráðin til lykta.