Suarez skoraði fernu í 4-0 sigri á Síle

Luis Suarez, framherji Liverpool og landsliðs Úrúgvæ, fann heldur betur skotskóna sína á móti Síle í undankeppni HM í nótt. Suarez, sem hefur farið illa með færin hjá Liverpool á tímabilinu,  skoraði öll fjögur mörkin í 4-0 sigri Úrúgvæ á Síle.

Diego Forlan er meiddur og gat ekki spilað leikinn og því treystu Úrúgvæmenn enn meira á Suarez. Þeir eru nú með þriggja stiga forskot á Argentínumenn eftir sigur sinn í nótt og 1-1 jafntefli Argentínu á móti Bólivíu.

Síle var reyndar með vængbrotið lið því þjálfarinn Claudio Borghi setti fimm leikmenn í agabann fyrir að mæta seint og í misjöfnu ástandi á fund hjá landsliðinu.

Fyrsta mark Suarez kom með hnitmiðuðu langskoti á 42. mínútu og það næsta rétt rúmum þremur mínútum síðar með skalla af marklínu eftir að hann fylgdi á eftir skoti félaga síns.

Suarez innsiglaði þrennuna með skalla eftir fyrirgjöf á 68.mínútu og fernan var síðan fullkomuð á 74. mínútu þegar hann lét vaða á vítateigslínunni. Suarez fékk síðan heiðursskiptingu þremur mínútum síðar.

„Svona kvöld hefur verið bara í draumum manns og ég mun aldrei gleyma þessum leik. Mér var sagt að Úrúgvæmaður hafi aldrei áður skorað fernu í undankeppni en ég hefði ekki getað þetta án hjálpar liðsfélaga minna," sagði Luis Suarez eftir leikinn.

Það er hægt að sjá mörkin hans Suarez með alvöru "gooooooooooooooool"-lýsingu með því að smella hér fyrir ofan.