Magnús Geir: Viðhorf sem dæmir sig sjálft

„Það öfgafulla viðhorf, sem fram kemur í greininni, dæmir sig í raun sjálft," segir Magnús Geir Þórðarson, leikhússtjóri Borgarleikhússins og leikstjóri leikritsins, Nei, ráðherra. Listakonurnar í leikhópnum Kviss bang búmm gagnrýndu Magnús harðlega í opinni grein, sem birtist á vef Félags leikstjóra á Íslandi (FLÍ).

Í greininni saka þær leikhússtjórann um að viðhalda niðurlægjandi birtingarmyndum á staðalímyndum kvenna, útlendinga og homma í leikritinu Nei, ráðherra sem er sýnt í Borgarleikhúsinu og hefur notið mikilla vinsælda undanfarin misseri.

Listakonurnar, þær Eva Björk Kaaber, Eva Rún Snorradóttir og Vilborg Ólafsdóttir, skrifa meðal annars:

„Áður en við gengum út (í hléi) höfðu tvær kvenpersónur stigið á svið. Önnur var í korseletti allan tímann, hún baðst ítrekað afsökunar á sjálfri sér, fékk engu ráðið um nokkurn skapaðan hlut og salurinn hló að því þegar mismunandi menn gripu um brjóstin á henni og einn skvetti framan í hana vatni. Hvað er fyndnara en niðurlægð, örvingluð, hálfnakin kona? Hinn kvenkarakterinn var kona sem hafði eitt verkefni þennan fyrri part; að koma handklæðum inn á bað. En konan sú, sem átti að leika útlending, var bara svo vitlaus að hún gat ómögulega komið handklæðunum fyrir á réttan máta."

Svo skora þær á leikhússtjórann að ráða kynjafræðing sem gæti þá aðstoðað leikhúsið við uppsetningu leikrita með jafnrétti í huga.

„Það er ábyrgðarhluti að fara opinberlega fram með svona ásakanir," segir Magnús og bætir við: „Því fer fjarri að Borgarleikhúsið niðurlægi nokkurn hóp, hvort sem það er sá sem þarna voru nefndir, eða aðra."

Spurður hvort honum lítist vel á hugmyndina að ráða kynjafræðing til þess að aðstoða við uppsetningu leiksýninga hjá Borgarleikhúsinu, svarar Magnús því til að hann muni láta ummælin hér fyrir ofan nægja.

Hér má hinsvegar lesa grein kvennanna.