Fótboltaleikir bara fyrir konur og börn í Tyrklandi - karlarnir í banni

Tyrkir ætla að beita nýrri aðferð þegar þeir refsa félögum fyrir ólæti á knattspyrnuleikjum í landinu. Knattspyrnusambandið hefur gefið út nýjar refsiaðgerðir þar sem að aðeins konur og börn undir tólf ára fá að koma á leiki en karlarnir eru í banni.

Fenerbahce var dæmt í tveggja leikja áhorfendabann í júlí eftir að stuðningsmenn liðsins ruddust inn á völlinn í æfingaleik á móti úkraínska liðinu Shakhtar Donetsk. Tyrkneska sambandið ákvað að milda refsinguna með því að leyfa það að konur og börn mættu vera í stúkunni á leikjunum tveimur.

Hér eftir gilda síðan þær reglur í Tyrklandi að það verða aðeins karlarnir sem eru útilokaðir frá leikjum þegar tyrknesk félög eru dæmd til að leika fyrir "luktum dyrum".

Fenerbahce gaf í framhaldinu konum og börnum 27 þúsund fría miða á leik Fenerbahce-liðsins við Manisaspor sem fram fór í kvöld.