Fyrsti sigurinn í höfn hjá Maradona

Diego Maradona fagnaði í dag fyrsta sigri sínum sem þjálfari Al Wasl liðsins í Sameinuðu arabísku furstadæmunum. Al Wasl vann þá 3-0 sigur á Emirates í Etisalat-bikarnum en öll mörk liðsins komu eftir hálfleiksræðu Argentínumannsins.

Maradona var orðinn áberandi stressaður eftir fyrri hálfleikinn þar sem leikmenn hans áttu meðal annars tvö stangarskot. Það var samt stutt í heimsfræga húmorinn hans og Maradona grínaðist með því að veifa þjálfaraliði sínu eftir að enn eitt færið fór forgörðum eins og það stefndi í að hann yrði rekinn eftir leikinn.

Stressið breyttist hinsvegar í sigurgleði í seinni hálfleiknum. Mariano Donda skoraði fyrsta markið í upphafi seinni hálfleiks og fyrirliðinn Essa Ali innsiglaði síðan sigurinn með tveimur mörkum undir lokin.

Al Wasl tapaði 3-4 í fyrsta leiknum undir stjórn Maradona sem var í sömu keppni á móti meisturunum í Al Jazira á fimmtudaginn var. Deildarkeppnin í Sameinuðu arabísku furstadæmunum hefst síðan 16. október.

Þetta er fyrsta þjálfarastarf Maradona síðan að hann hætti með argentínska landsliðið eftir HM í Suður-Afríku 2010.