Yordan Letchkov í þriggja ára fangelsi

Yordan Letchkov, varaforseti búlgarska knattspyrnusambandsins, var í vikunni tilkynnt að hann ætti að hefja afplánun þriggja ára fangelsisdóms.

Letchkov var dæmdur fyrir misnotkun á valdi sínu sem bæjarstjóri Sliven í Búlgaríu fyrir fimm árum. Afplánun dómsins var hins vegar frestað.

„Ég átti ekki von á þessari ákvörðun. Við munum áfrýja niðurstöðunni þar sem ég tel að um pólitískt bragð sé að ræða,“ sagði Letchkov við blaðamenn í vikunni.

Letchkov var hluti af landsliði Búlgaríu sem komst í undanúrslit á HM 1994 í Bandaríkjunum. Hann skoraði sigurmarkið gegn Þjóðverjum í 8-liða úrslitum með fallegum skalla.

Letchkov komst nýverið í fréttirnar fyrir að láta hafa eftir sér að nafnarnir Martin og Stilian Petrov ættu að hætta að spila fyrir landslið Búlgaríu. Þeir hefðu ekkert meira fram að færa fyrir landsliðið að sögn Letchkov.