Leonardo vill fá Beckham til Parísar

Brasilíumaðurinn Leonardo, yfirmaður íþróttamála hjá franska liðinu Paris Saint-Germain, segist gjarnan vilja fá David Beckham til liðs við félagið.

PSG fékk nýja eigendur fyrr á þessu ári er fjárfestingarfélag frá Katar keypti félagið. Síðan þá hefur það eytt háum fjárhæðum í nýja leikmenn.

„Það er ekkert útilokað í þessum efnum,“ sagði Leonardo í viðtali á heimasíðu BBC. „Hann er miklu meira en knattspyrnumaður. Hann er vörumerki - poppstjarna. Hann kæmi alltaf til greina í mínum huga.“

Leonardo þekkir vel til Beckham því hann var stjóri AC Milan þegar Beckham lék með liðinu til skamms tíma á lánssamningi frá LA Galaxy í Bandaríkjunum. Samningur Beckham við Galaxy rennur út síðar í haust.

„Ég ber mikla virðingu fyrir honum og það sem hann stendur fyrir. Hann hefur náð ótrúlegum árangri á sínum ferli.“

„En hann ber líka virðingu fyrir reglunum, hlustar á mann og vill aðeins það sem er liðinu fyrir bestu. Þess vegna þykir mér hann vera góð fyrirmynd. Ég hef unnið með honum áður og þess vegna er ég að ræða um hann nú.“