Maradona: Verðum ekki meistarar með þessa leikmenn

Diego Maradona er byrjaður að láta til sín taka sem knattspyrnustjóri Al Wasl í Sameinuðu arabísku furstadæmunum.

Lið hans tapaði á dögunum fyrir meisturum Al Jazira, 4-3, í fyrsta deildarleik liðsins undir stjórn Maradona. Hann segir nú ljóst að styrkja þurfi leikmannahópinn - núverandi leikmenn séu ekki nógu góðir til að verða meistarar.

Al Wasl er með jafn marga útlendinga í sínu liði og leyfilegt er og þarf því Maradona að leita innanlands að nýjum leikmönnum.

„Við þurfum einn sóknartengilið og einn sóknarmann,“ sagði Maradona við fjölmiðla. „Við stóðum okkur ágætlega gegn liði sem er búið að sanna sig sem meistari. Við fengum góð tækifæri í seinni hálfleik til að klára leikinn en nýttum þau ekki. Þess vegna þurfum við þessa leikmenn.“

„Strákarnir reyna hvað þeir geta en þeir geta ekki unnið meistaratitilinn.“