Beckham: Ánægður að einhver hefur enn áhuga á mér

David Beckham hefur staðfest að hann eigi enn í viðræðum við LA Galaxy um nýjan eins árs samning en núverandi samningur hans rennur út í nóvember.

QPR hefur lýst yfir áhuga á að fá Beckham, sem og franska félagið Paris Saint-Germain. Hann er 36 ára gamall en enn í fínu formi.

„Ég á marga vini í Englandi og víða um Evrópu,“ sagði hann við enska fjölmiðla. „Ég er því reglulega í sambandi við allt þetta fólk og hef ég heyrt af þeim orðrómum sem hafa verið í gangi um mig.“

„Það er gott að einhver hefur enn áhuga á mér þrátt fyrir aldurinn. Þetta eru mörg góð lið og margir frábærir knattspyrnustjórar.“

„Þetta er þó ekkert nýtt og sögusagnir af þessum toga hafa verið í gangi í mörg ár. Ég er leikmaður Galaxy eins og er og verð það áfram. Samningurinn minn rennur út í lok tímabilsins en ég er ánægður.“

„Við höfum rætt um nýjan samning en ég ætla þó að bíða með ákvörðun þar til að tímabilinu lýkur.“