Skoskt dagblað bað stjóra Celtic afsökunar

Skoska dagblaðið The Daily Record birti í dag afsökunarbeiðni til Neil Lennon, knattspyrnustjóra Celtic, á fyrirsögn sem birtist í blaðinu á laugardaginn.

„Hver er hataðri á Ibrox - Lennon eða skattmaðurinn?" stóð í umræddri fyrirsögn sem fór mjög svo fyrir brjóstið á forráðamönnum Celtic. Fyrir leik liðsins gegn erkifjendunum Rangers í gær var gefið út að þjálfarar og leikmenn Celtic myndu ekki ræða við blaðið eftir leik.

Til skýringar má nefna að Ibrox er heimavöllur Glasgow Rangers sem hefur átt í miklum fjárhagslegum erfiðleikum vegna vangoldina skatta. Hatur Rangers á Celtic þarfnast ekki frekari útskýringa.

The Daily Record baðst svo formlega afsökunar í blaði dagsins, undir fyrirsögninni „We're sorry". Var sérstaklega beðist afsökunar á því að hafa notað orðið hatur.

Rangers vann leikinn gegn Celtic um helgina, 4-2. Engum sögum fer af því hvort að fjölmiðlabanni Celtic gagnvart blaðinu hafi verið aflétt.